P. Paulus Weigl OSB (12. Januar 1890 – 11. Mai 1956)
Omnipotenti et misericordi Deo placuit post diversos morbos diuturnos et cru-ciatus iam non tolerandos, sed heroica fortitudine exantlatos die11. Maii 1956 a molestiis huius vitae terrenae liberare dilectissimum confratrem nostrum P. Paulum Weigl. Natus 12.1.1890, professionem emisit 25.10.1910. Theologiae studio inprimis addictus, per plurimos annos cum successu felici Doctrinam Christianam docuit alumnos institutorum nostrorum, quorum itidem director erat per multos annos. idem zelo vitae monasticae insignitus per terna triennia Moniales O.N. de Frauenwörth in conversatione religiosa instituit, mira cum industria et discretione spiritualis patris muneribus fungens. Tandem in monasterium suum reversus iterum erat professor Doctrinae Christianae atque eodem tempore novitiorum et clericorum fratrum magister, fractis quidem viribus, sed semper spiritu fervens; postremo laboriosissimo morbo canceroso afflictus complures operationes chirurgicas sustinuit, invicto semper animo et cupiens se devovere pro salute fratrum et fidelium.
Abbas et Conventus