P. Dr. phil. Amandus Bielmeier OSB (16. September 1902 – 12. Juli 1969)
Die 12. 7. 1969 post longam infirmitatem quievit in pace dilectus confrater noster anno aetatis 67, professionis 47, sacerdotii 44. Natus 16. 9. 1902 in Prünst, studiorum curriculo in schola nostra egregie absoluto, vitam monasticam amplexus est et 3. 5. 1923 votis se Deo obtulit. Studiis philosophicis ac theologicis in universitate Monacensi peractis, 10. 4. 1926 sacerdos ordinatus est. Deinde in universitate Herbipolensi studiis philologiae classicae se dedit, quae laurea in philosophia coronavit. Postea in gymnasio nostro magister, 1931–1968 adolescentium animis instruendis magna cum alacritate incubuit.
Cum eximiis naturae dotibus excelleret, mox ad alia quoque munera vocatus est. Per 4 annos seminario Ordinis, deinde per 12 annos instituto puerorum director praefuit. Per 23 annos (1939-1947, 1955-1969) cellerarius res familiares monasterii, iniquissimis quoque temporibus, manu forti, cum prudentia et fortuna, non solum administravit, sed etiam auxit, aedes veteres restituit, novas erexit. Praecipua cura infantibus, caritatis institutionibus sustentatis, in domo nostra hospitium ad relaxandum animum paravit. Insuper opus sociale ad aedificandas domos promovit et multis familiis in condendis novis domiciliis auxilium praebuit. Rerum publicarum curatores locales, quorum concilio ipse ab anno 1946 intererat, omnibus viribus adiuvit. Propter merita de bono communi loci ac regionis acquisita civis honorificus Metamensis nominatus et cruce meritoria reipublicae Germanicae decoratus est.
Quamvis laboribus onustus, tamen libenter curae animarum navabat. Fratribus erat amabilis, modestus, de omnibus assidue sollicitus. Quare huius confratris obitum iuremerito plangimus.
Ut Deus operario suo fideli laborum mercedem retribuat, Vestra precamur orationum ac sacrificiorum suffragia et orabimus pro Vestris.
S. Michaelis de Metten Abbas et Conventus